Epidemia e HIV/SIDA nuk ka mbaruar ende, autoritetet duhet t’i kushtojnë rëndësi pavarësisht Covid-19

1 Dhjetori shënon Ditën Botërore kundër HIV/SIDA, një përkujtim i shtetetve të të gjithë botës mbi rrezikun e përhapjes së virusit HIV, dhe shtimit të përpjekjeve parandaluese dhe informuese mbi virusin dhe sindromën e shkaktuar prej tij, SIDA (AIDS).

Në ditën e sotme OBSH u bën thirrje udhëheqësve globalë dhe qytetarëve të mblidhen në “solidaritet global” për të ruajtur shërbimet thelbësore të kurimit dhe parandalimit të HIV gjatë pandemisë së COVID 19 dhe më gjerë, si edhe për të siguruar sigurimin e vazhdueshëm të shërbimeve të HIV për fëmijët, adoleshentët dhe popullatat më të rrezikuara nga sëmundja.

Mbrojtja e njerëzve nga HIV gjatë pandemisë dhe sigurimi i trajtimeve për ta, është kritike. Studiuesit aktualisht po analizojnë nëse njerëzit me HIV kanë një rrezik në ekspozimin e tyre ndaj COVID-19, por të dhënat paraprake tregojnë një rrezik të shtuar, për aq kohë sa imuniteti i tyre mbetet i ulët.

OBSH dhe partnerët kanë dhënë alarmin në fillim të këtij viti, të shqetësuar për ndikimin e ndërprerjeve të raportuara në ofrimin e shërbimeve dhe furnizimin e klinikave me kurat e nevojshme, por deri tani, falë punës së pakursyer të punonjësve të shëndetësisë dhe komunitetit, numri i vendeve që raportojnë mungesë në shërbimet e HIV ka rënë me gati 75% që nga qershori. Vetëm 9 nga 152 vendet e anketuara ende raportojnë ndërprerje kurash apo furnizmim më të ulët, pavarësisht se për disa prej tyre, stoku mbetet ende tepër i ulët.

Infektimet e reja

101 raste të reja me HIV në Shqipëri gjatë vitit 2019.

Numri i njerëzve që jetojnë me HIV të padiagnostikuar po rritet në Rajonin Europian të OBSH-së. Sipas të dhënave të botuara sot nga organizata europiane e sëmundjeve ngjitëse ECDC dhe OBSH, më shumë se 136 000 njerëz u diagnostikuan rishtas në 2019, afërsisht 20% e këtyre diagnozave ishin në shtetet e Bashkimit Europian, ndërsa 80% në pjesën lindore të Europës.

Një në dy diagnoza të HIV (53%) ndodhin në një fazë të vonë të infeksionit, kur sistemi imunitar tashmë ka filluar të dështojë.

Kjo është një shenjë që strategjitë e testimit në rajon nuk po funksionojnë si duhet për të diagnostikuar herët HIV-in.

Sipas të dhënave të raportuara nga autoritetet në ECDC, numri i infektimeve në Shqipëri në vitin 2019 ishte në 101 infektime të reja, një nga shifrat më të larta në Ballkanin perëndimor.

Diagnostikimi i vonë kontribuon në transmetimin e vazhdueshëm të HIV pasi shpesh për vite me radhë, njerëzit nuk e dinë që kanë HIV dhe nuk marrin trajtim.

Megjithëse trendi në të gjithë rajonin e Europës Lindore është stabilizuar vitet e fundit, numri i njerëzve të sapo diagnostikuar me HIV është rritur me 16% që nga viti 2010.

OBSH shpreson që disa nga qasjet inovative të miratuara gjatë pandemisë së COVID-19 mund të ndihmojnë botën të arrijë dhe të përshpejtojë përparimin drejt synimeve globale të vitit 2025 dhe objektivave SDG për t’i dhënë fund SIDA si një kërcënim i shëndetit publik deri në vitin 2030.

Testimi dhe Kurimi

Rreth 26 milion njerëz në të gjithë botën marrin trajtim antiretroviral që nga mesi i vitit 2020, vetëm 2.4% më shumë sesa numri prej 25.4 milion në fund të vitit 2019. Kjo rritje është shumë e ngadaltë në krahasim me vitin e kaluar ku mbulimi i trajtimit u rrit me rreth 4.8% midis janarit dhe qershorit të vitit 2019.

Diagnostikimi i hershëm është i rëndësishëm sepse lejon njerëzit të fillojnë trajtimin me HIV më shpejt, gjë që nga ana tjetër rrit shanset e tyre për të jetuar një jetë të gjatë dhe të shëndetshme dhe parandalon transmetimin e mëtejshëm.

Në Shqipëri, testimi i shpejtë për HIV ofrohet nga Aleanca LGBTI+ falas, njëkohësisht nga autoritetet e shëndetit publik, në bashkëpunim me organizatat, të cilat kanë krijuar dhe njësinë lëvizëse të testimit.

Informacion më të detajuar mbi testimet, por edhe trajtimin e sëmundjes mund të merrni në faqen e HIV AIDS Albania në rrjete sociale.