Prezantimi i idesë së ndërtimit të HEC Skavica duket se ka ngjallur sërish debatin mbi ndërtimin e hidrocentraleve në vend.
Pasditen e sotme, dhjetera aktivistë u mblodhën në Tiranë për të kundërshtuar shkatërrimin e mëtejshëm të biodiversitetir dhe pasojat negative që ndërtimi i HEC ka në ekonominë e zonave përreth tyre.
Ndërtimi i hidrocentraleve në çdo lumë të Shqipërisë është vetëm në shërbim të interesave të ngushta të pak njerëzve, qofshin investitorë apo politikanë, dhe jo në shërbim të komuniteteve dhe publikut. Ndërtimi i tyre është në dëm të mjedisit, në dëm të brezave të ardhshëm, në dëm të publikut, në dëm të pjesëmarrjes, në dëm të demokracisë.
Të organizuar në grupimin “Të mbrojmë lumenjtë”, protestuesit i konsideruan HEC-et e planifikuar si një rrezik më i madh dhe emergjent se koronavirusi.
“Ndërsa koronavirusin po përpiqemi ta mundim duke i ndenjur larg njëri tjetrit do duhet që virusin “HEC” ta luftojmë duke i ndënjur afër njëri tjetrit.”, deklarohet në thirrjen e tyre për protestë.
Duke i quajtur hidrocentralet si një virus,, ata bëjnë thirrje për të kundërshtuar këto projekte.
“Armikun e kemi përballë. Ja dimë dobësitë, ja dimë aleatët, ja dimë taktikat. Ne jemi shumë. Ne do fitojmë.” deklaruan protestuesit.
“Ne jemi në luftë prej dy vitesh me mafian e organizuar. Jo masakrës se parkut kombëtar, ndaloni këtë masakër sa nuk është vone. Po kryhet një masakër ekologjike e parikuperueshme, ne do të jemi në rezistencë te vazhdueshme.” deklaroi Dhimitër Koleci, aktivist.
Aktivistët kërkojnë nga qeveria të heq dorë menjëherë nga mbështetja e HEC-eve në çdo lum e çdo përrua të vendit, duke vënë në dukje faktin se ka rreth 700 të tilla, nga Veriu në Jug, që kanë sjellë dëme të mëdha për përfitimin e një grupi të vogël njerëzish.
