Në datën 21 Shkurt të këtij viti, në Institucionin e Ekzekutimit të Vendimeve Penale 313 “Jordan Misja”, u gjet i vetëvrarë në qelinë e tij me një çarçaf, shtetasi i paraburgosur me origjinë nga Kukësi, Bilal Hasani, i moshës 43 vjeç. Ky shtetas, sipas medias rezulton të jetë akuzuar nga prokuroria për vjedhjen e një portofoli në vlerën 12,000 Lek.
Në vijim të kësaj ngjarje tragjike që tronditi opinionin publik dhe tërhoqi vëmendjen e organizatave të shoqërisë civile të të drejtave të njeriut, u njohëm me denoncimin e familjarëve të të ndjerit Bilbil Hasani, në emisionin investigativ Stop, në Tv Klan.
Familjarët pretendojnë se praktika e caktimit të masës së sigurimit personal nga Gjykata e Shkallës së Parë Tiranë dhe shqyrtimi i kërkesës ankimore kundër masës së sigurimit të depozituar pranë Gjykatës së Apelit Tiranë janë shoqëruar me shkelje të garancive procedurale të nenit 5 (e drejta për liri dhe siguri) dhe nenit 6 (e drejta për një proces të rregullt) të Konventës Evropiane të të Drejtave të Njeriut.
Për shkak të situatës së pandemisë, si organizata të shoqërisë civile nuk kemi mundësi të aksesojmë dokumentacionin e prokurorisë dhe atë gjyqësor. Ne jemi mbështetur në të dhënat/indiciet e publikuara në media, dhe më konkretisht procesverbalit të transkriptuar audio të publikuar në media (link: https://tvklan.al/zbardhet-audio-regjistrimi-gjyqtaret-kishin-dijeni-per-semundjen-e-bilbil-hasanit/).
Bazuar në këto të dhëna, organizatat adresuan shqetësimet e tyre dhe të familjarëve të viktimës përmes një letre drejtuar Inspektorit të Lartë të Drejtësisë, duke vënë në dijeni dhe Prokurorinë, Këshillin e Lartë GJyqësor dhe Këshillin e Lartë të Prokurorisë.
Nga materiali i publikuar në media rezulton se gjendja shëndetësore e personit nën hetim, të ndjerit Bilbil Hasani, i cili vuante nga probleme mendore, është anashkaluar edhe nga ana e prokurores znj.Elina Kombi.[1] Gjithashtu, nga investimi i kryer nga ana e medias rezulton se gjyqtari i gjykatës së shkallës së parë Z. Ardian Kalia, i cili ka realizuar vleftësimin e masës arrest në flagrancë dhe caktimin e masës së sigurimit personal “arrest në burg” ka qenë në dijeni të gjendjes shëndetësore, për shkak se 3 (tre) epikriza janë depozituar nga ana e mbrojtëses së zgjedhur dhe janë bërë pjesë e fashikullit gjyqësor.
Nisur nga praktika gjyqësore e Gjykatës Europiane të të Drejtave të Njeriut, në përgjithësi në këndvështrim të nenit 5 KEDNJ (e drejta për liri dhe siguri) do të ishte e papranueshme që të kufizosh lirinë e një individi me çrregullime të shëndetit mendor, në një mjedis të përshtatshëm terapeutik.[2]
Duke marrë parasysh se pasoja e rëndë e humbjes së jetës (nëpërmjet vetëvrasjes) të shtetasit Bilbil Hasani është e pariparueshme, [organizatat e shoqërisë civile] kërkojmë me anë të kësaj shkrese nga Inspektori i Lartë i Drejtësisë, verifikimin dhe fillimin e procedimit disiplinor ndaj subjekteve përgjegjës (gjyqtarë/prokurorë) për praktikën e masës së sigurimit ndaj të ndjerit Bilbil Hasani, i vetëvrarë në IEVP 313.
Gjithashtu, i drejtohemi Këshillit të Lartë Gjyqësor, Këshillit të Lartë të Prokurorisë dhe Prokurorit të Përgjithshëm që në ushtrim të kompetencave të tyre, dhe duke nxitur format efektive të bashkëpunimit midis tyre, të kontribuojnë në ndërgjegjësimin e aktorëve të sistemit të drejtësisë që masa e sigurimit “arrest në burg” të zbatohet në mënyrë përjashtimore si masë e fundit, konform standarteve ndërkombëtare por dhe kërkesave të Kodit tonë të Procedurës Penale.
Në vijim letra e plotë:
Referenca:
[1] Link: http://stop.tvklan.al/stop-emisioni-147-sezoni-5-24-mars-2020-skandali-vetevritet-ne-qeli-i-akuzuari-per-vjedhje-qe-kurohej-per-skizofreni/
[2] Çështja Hutchison Reid v. the United Kingdom, 50272/99, 20.02.2003.
