Redaksia, Autor në Historia ime

Author

Redaksia

Feminizmi / SLIDER BALLINA / Te Drejtat e Njeriut

Ngacmimet seksuale/ Studentët e Universitetit të Prishtinës në protestë kundër profesorit

Redaksia Posted On 08/11/2018

Një protestë kundër ngacmimeve seksuale është zhvillua nga studentë të Universitetit të Prishtinës së bashku me Organizatën për Rritjen e Cilësisë në Arsim (ORCA). Protesta është zhvilluar në oborrin e rektoratit kundër dhënies së gradës “profesor i rregullt” për pedagogun Milaim Sejdini.

Mbi profesor Sejdinin rëndojnë akuzat e shkeljes disiplinore si dhe ngacmimit seksual. Sipas burimeve pranë “Ekonomia online” Milaim Sejdini ka ngacmuar seksualisht një studente e cila ishte kandidante për doktoraturë asokohe.

“Ne jemi mbledhur në këtë tubim protestues për të kërkuar pezullimin e profesor Sejdini dhe hetimin për akuzat që rëndojnë mbi të. Mbi të rëndojnë akuzat e falsifikimit të nënshkrimit, për plagjiaturë si dhe abuzim seksual, ndërkaq senati i Prishtinës pritet të lidhi kontratë të përhershme me profesorin në fjalë” shprehet një prej studentëve protestues.

Donika Hoti, një tjetër studente pranë Universitetit të Prishtinës u shpreh se një profesor i tillë nuk meriton të ketë një kontratë me universitetin. “Ndaj Milaim Sejdinit janë ngritur tri akuza, njëra më e rëndë se tjetra: për plagjiaturë, për falsifikim dhe për ngacmim seksual ndaj një studenteje” u shpreh studentja Hoti.

Protestuesit kanë kërkuar nisjen e hetimeve për të gjitha akuzat ndaj tij, si për plagjiaturë, falsifikim dhe ngacmim seksual./k.m/

Burimi: Insajderi

MEDIA / SLIDER BALLINA / Te Drejtat e Njeriut

Sistemi gjyqësor në Bosnje-Hercegovinë kufizon informacionin për krimet e luftës

Redaksia Posted On 08/11/2018

Gjykatat në Bosnje dhe prokurorët po e kufizojnë aksesin për informimin rreth dosjeve të krimeve të luftës, duke e bërë akoma dhe më të vështirë raportimin rreth krimeve të luftës si dhe çështjeve të korrupsionit, edhe pse legjislacioni dëfton se këto gjyqe janë të hapura për të gjithë.

Rreth 15 vite pas reformimit të sistemit gjyqësor në Bosnje-Hercegovinë, gjykatat dhe trupi gjykues nuk e aplikojnë ligjin njësoj, sidomos kur vjen puna tek transparenca. Seancat gjyqësore të zhvilluara regjistrohen pjesërisht dhe gazetarët ende ndeshen me vonesa kur shtrojnë kërkesën për këto gjyqe.

Mervan Mirascija nga “Open Society Fund” e cila monitoron sistemin gjyqësor në vend, u shpreh se transparenca e sistemit gjyqësor është një element i rëndësishëm për të garantuar drejtësinë në vend.

“Ne jetojmë në një vend që është akoma duke mbajtur të fshehtë të kaluarën, edhe pse kanë kaluar tashmë 25 vite që prej përfundimit të luftës. Ky vend ka nevojë për të vërtetën në drejtësi në mënyrë që shoqëria të ketë mundësi të arrijë progresin. Fatkeqësisht, aksesi në informacion minimizohet çdo vit. Ky është një fenomen shqetësues” u shpreh Mirascija.

“Media luan një rol të rëndësishëm në komunikimin e krimeve të luftës për të garantuar informimin e publikut për viktimat e luftës dhe abuzimin me të drejtat e njeriut gjatë asaj periudhe” u shpreh një gazetare pranë BIRN Bosnja-Hercegovina./k.m/

Burimi: BIRN Bosnje-Hercegovinë

Shendetesi / SLIDER BALLINA

Kosova, e para në Europë për vdekjet nga ndotja e ajrit

Redaksia Posted On 08/11/2018

Tre shtete të Ballkanit, Kosova, Serbia dhe Maqedonia kryesojnë në Europë për nivelin e lartë të vdekjeve nga ndotja e ajrit, në raport me popullsinë.

Të dhënat, për vdekjet në vlerë absolute, janë publikuar së fundmi nga Agjencia Europiane e Mjedisit në raportin “Cilësia e ajrit në Europë – 2018” dhe janë përpunuar nga Revista Monitor në raport me popullsinë e vendeve përkatëse. Informacioni i referohet vitit 2015.

Kosova kishte 3,700 vdekje nga ajri i ndotur, që duke pasur parasysh popullsinë e saj prej vetëm 1.8 milionë banorësh e rendit atë të parën në Europë, ku ajri i ndotur ka bërë që të humbin jetën 0.2% e popullsisë. Në Serbi, ky tregues është 0.18% (rreth 13 mijë vdekje) dhe në Maqedoni 0.14% e popullsisë (3,000 vdekje), duke u renditur përkatësisht në vend të dytë dhe të tretë në Europë.

Shqipëria, ndryshe nga shtetet e tjera të Ballkanit, rezulton të ketë një nivel relativisht të ulët të vdekjeve të shkaktuara nga ajri i ndotur, që llogariten në 1400 persona në vit, ose 0.05% e popullsisë, duke u renditur e 29-a në Europë, nga 37 shtete gjithsej.

Në vlerë absolute, vdekjet më të mëdha janë në Gjermani dhe Itali, përkatësisht 62.3 mijë dhe 60 mijë persona. Nuk është befasuese që Gjermania të ketë shifër të lartë, duke pasur parasysh se ka popullatën më të madhe të çdo vendi të BE-së. Por nëse llogariten vdekjet e lidhura me ndotjen e ajrit për 100,000 banorë, vende si Bullgaria, Rumania dhe Hungaria e kanë këtë tregues shumë më keq.

Të dhënat sugjerojnë se, bazuar në përqendrimet e matura në stacionet e sfondit urban dhe në periferitë, Kroacia ishte gjithashtu mbi detyrimin e përqendrimit të ekspozimit të ndotësve të vlerësuar prej 21 pg / m3. Vende të tjera që vlerësohen me ndotje në ajër mbi 20 pg / m janë Serbia (23 pg / m3, të dhënat vetëm për 2016), Shqipëria (25 pg / m3, 2015-2016), Kosova9 (27 pg / m3, 2015-2016), Bosnja dhe Hercegovina (33 pg / m3, 2016), dhe Ish-Republika Jugosllave e Maqedonisë (52 pg / m3, 2015-2016). Sipas këtyre të dhënave, Maqedonia rezulton vendi me ndotjen më të lartë në Ballkan, e ndjekur nga Kosova, më pas nga Shqipëria.

Transporti rrugor është një nga burimet kryesore të Europës për ndotjen e ajrit, sidomos të ndotësve të dëmshëm si dioksidi i azotit dhe grimcat, sipas ‘Cilësia e ajrit në Europë – raporti i vitit 2018’ nga Agjencia Europiane e Mjedisit. Emetimet nga bujqësia, prodhimi i energjisë, industria dhe konsumi i familjeve po kontribuojnë gjithashtu në ndotjen e ajrit. Raporti paraqet të dhënat më të fundit zyrtare të cilësisë së ajrit të raportuara nga më shumë se 2 500 stacione monitorimi në të gjithë Europën në 2016./ k.j

Burimi: Revista Monitor

Ndodhi sot / SLIDER BALLINA / Te Drejtat e Njeriut

Protesta e banorëve të Astirit dhe mospërfillja e qytetarëve në vendimmarrjen lokale

Redaksia Posted On 08/11/2018

Vazhdon prej disa ditësh protesta e banorëve të zonës së Astirit në Tiranë, shtëpitë e të cilëve do të prishen për shkak të zgjerimit dhe rehabilitimit të plotë të Unazës së Re. Që prej ditës së shtunë, banorët po ngrihen në protesta të përditshme ndaj një vendimi të pakonsultuar më parë dhe të përsëritur nga Bashkia Tiranë.

Banorët kanë vendosur të bllokojnë Unazën e Re, në shenjë proteste, derisa dikush tu japë llogari mbi procesin e vlerësimit të pronës dhe investimit të tyre.

Situata është e përsëritur. Fillimisht u zhvendosën banorët përgjatë gjurmës së Bulevardit të ri, më pas banorët e zonës së Bregut të Lumit, pjesa më e madhe e tyre individë të komunitetit rom. Menjëherë pas zgjedhjeve të përgjithshme rradha ishte e banorëve të Shkozës, e sot pas një viti, para disa ditësh u njoftua plani i zgjerimit të Unazës së Re, i cili synon një zgjerim të rrugës e prishjen e qindra bizneseve dhe banesave. Në projektin zyrtar deklarohet prishja e rreth 300 objekteve, ndërsa banorët deklarojnë një numër më të madh objektesh të rrezikuara nga prishja, rreth 490.

Në kushte normale, vendimmarrje të tilla duhet të konsultohen fillimisht me publikun, përmes përfaqësuesve vendorë dhe administratorëve lokalë të zonës. Banorët akuzojnë vendimin si të padrejtë dhe janë gjetur të papërgatitur për tu zhvendosur apo për të transferuar aktivitetin e tyre tregtar diku tjetër. Disa prej tyre kanë kërcënuar dhe me përshkallëzim të protestave dhe vetëflijim.

Disa nga banorët i kanë banesat dhe bizneset të legalizuara ndërsa shumica i ka ato në proces. Projekti parashikon të lidhë shkollën Teknologjike me sheshin Shqiponja dhe përbëhet prej dy korsive vajtje-ardhje prej 11.5 metra. Parashikohet të jenë tre korsi aktive sipas standardeve europiane 2 nga 3.75 m njëra dhe një tjetër për emergjenca prej 3 metra./ k.j

Media / SLIDER BALLINA / Te Drejtat e Njeriut

Pritet takimi i radhës i presidentëve Vuçiç-Thaçi në Bruksel

Redaksia Posted On 07/11/2018

Drejtuesja e kabinetit për politikën e jashtme me BE, Federica Mogherini u shpreh se ajo do të zhvillojë një raund të ri për dialogun midis Kosovës dhe Serbisë (presidentëve përkatës) ku do t’iu kërkohet një punë më intense në normalizimin e raporteve midis dy vendeve.

Ky takim pritet të zhvillohet në datën 8 nëntor midis presidentit të Serbisë, Aleksandar Vucic si dhe presidentit kosovar, Hashim Thaci. Dy liderët priten të konfirmojnë gatishmërinë për të intensifikuar përpjekjet për të nënshkruar një marrëveshje që është obliguese nga ana ligjore për normalizimin e marrëdhënies, e cila është e një rëndësie të veçantë në rrugën drejt Evropës.

Dy presidentët do të takohen për të parën herë pas anullimit të papritur të Vucic të takimit me homologun e tij kosovar. Ky takim ishte planifikuar të zhvillohej në Bruksel, pas zhvillimit të një takimi bilaterial mes Vucic dhe Mogherini.

Kosova e deklaroi pavarësinë nga Serbia në 2008. Që prje atëhere politikanët serbë janë përbetuar se pranimi I pavarësisë së Kosovës nuk do të bëhet asnjëherë. Gjithsesi të dyja vendet janë mbrapa dhe nën presion për të zgjidhur konfliktin i cili po zgjat më shumë se një dekadë. Ky konflikt dhe zgjidhja e tij përbën një nga kriteret për rrugën drejt anëtarësimit në BE./k.m/

Burimi: Balkan Insight

LGBTI+ / SLIDER BALLINA / Te Drejtat e Njeriut

10 burra arrestohen në Tanzani për shkak të homoseksualitetit

Redaksia Posted On 07/11/2018

Sipas organizatës ndërkombëtare “Amnesty International”, policia zhvilloi një mësymje pranë plazhit me emër Pongwe Beach në Tanzani, duke arrestuar disa burra mbrëmjen e së shtunës (3 nëntor).

Gjashtë të tjerë arritën të arratisen, duke u larguar nga vendngjarja. Të arrestuarit po mbahen në stacionin policor në Chakwal në Unguja. Asnjë akuzë nuk është bërë akoma ndaj tyre. Martesat gej ende mbeten ilegale në vend dhe mund të ballafaqohen me burgim të përjetshëm në Tanzani nëse personat homoseksualë kryejnë marrëdhënie seksuale.

Sipas organizatës, këta djem janë arrestuar pasi dyshohet se kanë kryer marrëdhënie seksuale. Policia ka raportuar se djemtë ishin ulur pranë njëri tjetrit në çifte. Seif Magango, drejtues i Amnesty International për rajonin e Afrikës Lindore i bëri apel autoriteteve tanzaniane për lirimin e të arrestuarve.

“Kjo mësymje ndaj komunitetit në Tanzani dëshmon për mungesën e respektimit të të drejtave të njeriut në Tanzani, e nxitur prej retorikës diskriminuese që buron nga qeveria” u shpreh Magango. Ky i fundit u shpreh se tahsmë ekziston rreziku se këta të arrestuar do ti nënshtrohen një ekzaminimi anal./k.m/

Burimi: Pink News

LGBTI+ / SLIDER BALLINA / Te Drejtat e Njeriut

Tanzania fillon një fushatë përndjekjeje për personat e komunitetit LGBT

Redaksia Posted On 07/11/2018

Zyrtarët e Tanzanisë kanë krijuar një grup pune që synon gjetjen dhe ndëshkimin e personave të komunitetit LGBT.

Qindra aktivistë LGBT në Tanzani janë fshehur pasi u njoftua vendimi i autoriteteve vendore. Paul Makonda, kreu administrativ i kryeqytetit Dar es salam, tha se kishte ngritur një ekip me efektivë të policisë, që do të merrej me iidentifikimin e homoseksualëve dhe dënimin e tyre në burg, në kuadër të rritjes së retorikës diskriminuese kundër LGBT.

Në një intervistë të postuar në YouTube, Makonda kërkoi që tanzanianët të raportonin njerëzit homoseksualë dhe se deri tani kishte marrë më shumë se 5,700 raportime nga publiku, duke përfshirë më shumë se 100 emra.

Një aktivist LGBT, deklaroi për The Guardian në kushte anonimiteti se: “Autoritetet kanë nisur kontrollin dhe bastisjen e shtëpive. Është një gjë e tmerrshme dhe gjendja do të përkeqësohet. Shumë njerëz po largohen nga qyteti. Ata janë duke shënjestruar aktivistët, duke thënë se po promovojmë homoseksualitetin. Duhet të fshihemi. ”

Një aktivist tjetër në qytet e përshkroi atmosferën si “sezon gjuetie për njerëzit homoseksualë” dhe njoftoi se listat e emrave po publikoheshin në rrjete sociale. “Mund të imagjinoni se çfarë po ndodh në familjet e personave që kanë emrin në listë,” tha ai.

Ministria e jashtme e Tanzanisë ka thënë se fushata e Makonda përfaqëson pikëpamjet e tij personale dhe jo qëndrimin zyrtar të qeverisë. Por zyrtarët kanë mbështetur vazhdimisht një sërë masash homofobike që kur John Magufuli u bë president në vitin 2015 në një platformë anti-lgbt.

Grupet e mbrojtjes së të drejtave të njeriut kanë akuzuar Tanzaninë për ndjekjen e një “rruge të rrezikshme”. Vendi gjithashtu përballet me kritika në rritje lidhur me abuzimet në të tjera fusha të të drejtave të njeriut./ k.j

Femijet / Ndodhi sot / SLIDER BALLINA

Lirohen 79 nxënës të rrëmbyer në Kamerun

Redaksia Posted On 07/11/2018

Nxënësit e rrëmbyer nga një shkollë në rajonin veriperëndimor të Kamerunit janë liruar, sipas burimeve zyrtare të vendit. 79 nxënës dhe tre persona të tjerë u rrëmbyen të dielën në kryeqytetin e rajonit Bamenda. Drejtori i shkollës, shoferi dhe një mësues janë ende peng, raporton BBC.

Rrethanat e lirimit të nxënësve nuk janë të qarta, por autoritetet thonë se po merren në pyetje para se të ribashkohen me prindërit e tyre. Sipas Kishës Presbiteriane të Kamerunit, studentët u braktisën në një nga ndërtesat e tyre në qytetin Bafut, rreth 24 km nga Bamenda.

Kisha gjithashtu zbuloi se rrëmbimi i së dielës ishte rasti i dytë në të njëjtën shkollë në më pak se një javë. Ministri i Komunikimit Issa Bakary Tchiroma tha për AFP se “të gjithë 79 nxënësit janë liruar”, por nuk dha detaje të mëtejshme mbi rrëmbyesit apo ngjarjen./ k.j

Ndodhi sot / Shendetesi / SLIDER BALLINA

Tirana i shtohet listës së qyteteve europiane me ajrin më të ndotur

Redaksia Posted On 07/11/2018

Sipas një studimi të OBSH, qytetet industriale në shtetet e Ballkanit perëndimor, kanë ajrin më të ndotur në Europë. Tetova në Maqedoni dhe Tuzla në Bosnje-Hercegovinë ishin në listën e 10 qyteteve më të ndotura europiane.

Mesa duket dhe Tirana mbetet në grupin e qyteteve më të ndotur në Europë. Ekspertët e faqes së internetit “Numbeo”, të specializuar për informacionet statistikore, intervistuan banorët në mbi 70 qytete europiane për ndotjen. Në raportin “Indeksi i Ndotjes”, çdo qytet u vlerësua nga 0-100, ku 100 ishte ndotja maksimale. Si më të ndoturit rezultuan: Tetova (97,57), Napoli (84,61), Shkupi (82,17) dhe Tirana në vend të katërt (80,51). Mes më të ndoturve janë dhe Bukureshti, Roma, Barcelona, Parisi dhe Milano.

Arsyet kryesore të ndotjes në Tiranë janë: trafiku, sistemi rrugor si dhe industria e ndërtimit.

Ndërsa qytetet më të pastra janë: Helsinki (13,49), Reikjavik (15,57), Zyrihu (16,42), Stockholmi (16,62) dhe Malmo (16,67)./ k.j

Edukimi / SLIDER BALLINA / Te Drejtat e Njeriut

UNESCO krijon Observatorin e gazetarëve të vrarë

Redaksia Posted On 07/11/2018

Një Observator i Gazetarëve të Vrarë, që synon të dokumentojë rastet dhe masat e marra për të ndëshkuar krimet e ndodhura kundër gazetarëve profesionistë, u krijua sot nga UNESCO me qëllim luftimin e pandëshkueshmërisë së këtyre vrasjeve.

“Ky Observator do të shërbejë si një bazë të dhënash në internet, ku do të tregohet ecuria e procesit të hetimeve gjyqësore të zhvilluara për çdo vrasje të gazetarëve apo të profesionistëve të mediave të identifikuar nga UNESCO që prej vitit 1993, bazuar në informacionet e dhëna nga vendi ku ka ndodhur vrasja”, shpjegon UNESCO në një komunikatë.

Rreth 1 293 vrasje që prej vitit 1993 janë identifikuar nga ky Observator, nga të cilat 80 kanë ndodhur këtë vit./ k.j

Feminizmi / Ndodhi sot / SLIDER BALLINA / Te Drejtat e Njeriut

Kandidatët që bënë histori ditën e djeshme gjatë zgjedhjeve në SHBA

Redaksia Posted On 07/11/2018

Siç ishte parashikuar, demokratët në SHBA arritën të fitojnë mazhorancën në Dhomën e Përfaqësuesve, ndërsa republikanët arritën të mbajnë mazhorancën në Senat. Zgjedhjet u shoqëruan me debate e polemika të shumta, por rezultatet paraqiten historike për disa gara, përsa i përket diversitetit dhe kandidatëve që vinë nga minoritete të caktuara të shoqërisë.

Guvernatori i Kolorados

Jared Polis fitoi në garën për guvernator të shtetit të Kolorados. Polis vjen nga komuniteti LGBT dhe është guvernatori i parë gay në historinë e SHBA-ve. Ish përfaqësues në Kongres, Polis që në fushatën e parë elektorale të vitit 2009, nuk e fshehu orientimin e tij seksual, dhe gjatë 2 viteve të fundit e përdori këtë fakt për të kundërshtuar politikat konservatore të administratës Trump. Platforma e tij progresiviste përfshin përkrahjen e politikave sociale në shëndetësi, ligje më të rrepta për zotërimin e armëve si edhe investime në energji të rinovieshme.

Jared Polis, i bashkohet Guvernatores së shtetit të Oregonit, e cila identifikohet si biseksuale. Në Kongres ai i shte një nga përkrahësit e lëvizjeve ligjore pro përdorimit të marijuanës, e cila ktheu Koloradon në shtetin e parë ku u legalizua përdorimi i marijuanës për qëllime rekreacioni.

Anëtarja më e re në moshë e Kongresit

Alexandria Ocasio-Cortez, do të jetë përfaqësuesja më e re në moshë në Kongres, nga shteti i New York-ut. Ajo sapo festoi muajin e shkuar 29 vjetorin, dhe ishte një nga kandidaturat që u përkrah më shumë në këto zgjedhje, nga demokratët kudo në SHBA. Në zgjedhjet brenda partisë demokratike, ajo mundi kandidatin Joe Crowly, i cili ishte një nga figurat më me ndikim në Dhomën e Përfaqësuesve.
Cortez përfaqëson komunitetin latin të shtetit të New York-ut dhe erdhi në pushtet falë një platforme social-demoratike dhe progresiviste, ku i kushtoi më shumë rëndësi mbështetjes sociale, shëndetësisë, financimit të kredive studentore nga shteti si dhe politikave për përkrahjen e emigrantëve.

Gratë fituese nga komuniteti vendas indian

Demokratet Sharice Davids dhe Deb Haaland do të bëhen gratë e para indiane të zgjedhura në Kongres. Ato përfaqësojnë respektivisht shtetet e New Mexico dhe Kansas.
Davids është anëtare e kombit indian Ho-Chunk dhe Haaland është një anëtare e regjistruar e Pueblo of Laguna.
Fitoret për dy gratë me origjinë nga komunitetet indiane vendase, shënojnë një tjetër moment historik në sistemin politik amerikan.

Muslimanet e para në Kongres

Demokratja nga shteti i Michigan-it Rashida Tlaib dhe Ilhan Omar, kandidatja e Partisë Demokratike të Minesotës, siguruan vendet e tyre përkatëse në Dhomën e Përfaqësuesve, pas fitoreve kryesore të padiskutuara në shtetet përkatëse.
Omar, përveç të qenit njëra nga gratë e para muslimane në Kongres, do të jetë gjithashtu anëtarja e parë somalezo-amerikane. Ajo erdhi në SHBA më shumë se dy dekada më parë si një refugjate së bashku me familjen e saj./k.j

Feminizmi / SLIDER BALLINA / Te Drejtat e Njeriut

Ngacmimet seksuale në hapësirat publike

Redaksia Posted On 07/11/2018

Ngacmimet seksuale shfaqen në forma të ndryshme, por në shumicën e rasteve viktimat pre e kësaj dhune nuk kanë prova. Në rastin e tramvajit në Beograd rasti i dhunës u regjistrua në kamera. Edhe pse rasti provokoi opinionin publik, reagimet në rrjetet sociale tregojnë për mënyrat e ndryshme se si njerëzit reagojnë ndaj dhunës, në këtë rast vetë viktima si dhe pasagjerë të tjerë.

Ajo çfarë iu bëri përshtypje njerëzve ishte mungesa e reagimeve nga pasagjerët e tjerë si dhe shoferi i autobusit. Disa prej komentuesve në rrjetet sociale e akuzuan viktimën që nuk arriti të mbrojë veten.

Në raste të ngjashme, viktimat nuk ndihen gati që të kundërveprojnë dhe mekanizmi i vetë mbrojtjes nuk funksionon. Në rastin e tramvajit në Beograd, doli në pah se pak njerëz janë të ndjeshëm dhe empatik ndaj viktimës, në këtë rast. Ky është një rast tjetër ku shihet se urrejtja drejtohet tek viktima se sa tek vetë agresori.

Faqja në Facebook “Live from trams and buses of Belgrade” publikoi filmime nga një prej tramvajeve në Beograd ku shihet qartë një vajzë e cila po ngacmohej fizikisht nga një djalë. Pasagjerët e tjerë shohin por nuk reagojnë. Video u shpërnda gjerësisht në rrjetet sociale duke hapur një debat publik.

Policia arriti të identifikojë agresorin , i cili u arrestua. Organizata “Autonomous Women’s Center” e cila lobon për të drejtat e grave ka realizuar një anketim për dhunën dhe ngacmimet seksuale. Sipas të dhëna të marra, 9 nga 10 gra dhe vajza në Serbi kanë rënë pre e ngacmimeve seksuale./k.m/

Burimi: NewsMavens

SLIDER BALLINA / Te Drejtat e Njeriut

Facebook zotohet të angazhohet më shumë në mbrojtjen e të drejtave të njeriut

Redaksia Posted On 06/11/2018

Kompania Facebook deklaroi të hënën se një raport i të drejtave të njeriut i porositur nga vetë kompania për praninë e Facebook në Mianmar, tregoi se nuk ishte bërë mjaftueshëm për të parandaluar përdorimin e rrjetit social për të nxitur dhunën dhe mesazhet e urrejtjes.

Raporti rekomandoi që Facebook të zbatojë më rreptësisht politikat e përmbajtjes dhe të sigurisë, të rrisë angazhimin me zyrtarët e Mianmarit dhe grupet e shoqërisë civile dhe të publikojë rregullisht të dhëna shtesë lidhur me përparimin e gjendjes së të drejtave të njeriut në vend.

“Raporti arrin në përfundimin se, para këtij viti, ne nuk po bënim mjaftueshëm për të ndihmuar në parandalimin e përdorimit të platformës sonë për të nxitur ndasitë dhe dhunën në Mianmar. Ne pajtohemi se mundemi dhe duhet të bëjmë më shumë, “tha Alex Warofka, një menaxher i politikës së produkteve në Facebook, në një postim në blog.

Një raport i veçantë i Reuters në gusht zbuloi se Facebook dështoi të merrte parasysh paralajmërimet e shumta nga organizatat në Myanmar rreth postimeve të mediave sociale që nxitnin sulme ndaj grupeve minoritare si komuniteti Rohingya. Në gusht të vitit 2017 ushtria nisi një përndjekje të komunitetit musliman të Myanmarit, në përgjigje të sulmeve të kryengritësve Rohingya, duke përzënë më shumë se 700,000 muslimanë në Bangladeshin fqinj, sipas të dhënave të OKB.

Facebook ka qenë në qendër të kritikave dhe më parë dhe është akuzuar se nuk ka parandaluar mesazhe të urrejtjes e dhunës apo dhe ka lejuar ndikimin e grupeve të caktuara në influencimin e opinionit të shoqërisë, si në rastin e zgjedhjeve presidenciale në SHBA apo gjatë fushatave politike të nacionalistëve në Europë./ k.j

Burimi:reuters

SLIDER BALLINA / Te Drejtat e Njeriut

Kina dërgon miliona Ujgurë në kampe internimi

Redaksia Posted On 06/11/2018

Kritikat po rriten ndaj qverisë kineze,pas raporteve që konstatojnë ekzistencën e kampeve të internimit në territorin perëndimor kinez të Xinjiang. Një grup diplomatësh britanikë që vizituan Xinjiang para disa muajsh, kanë konfirmuar ekzistencën e kampeve të internimit masiv për muslimanët ujgur, tha sekretari i jashtëm britanik, Jeremy Hunt.

Mendohet se në territorin perëndimor të Kinës, janë internuar rreth 1 milion anëtarë të pakicave muslimane në një rrjet kampesh. Sekretari i Jashtëm i tha parlamentit të martën se diplomatët kishin vizituar Xinjiang në gusht dhe “pajtohen që këto raporte janë gjerësisht të sakta”.

Komenti i tij ushtron presion mbi Pekinin përpara një mbledhjeje të Këshillit për të drejtat e njeriut të OKB-së, i cili do të shqyrtojë ditën e sotme situatën e të drejtave të njeriut në Kinë. Britania e Madhe, SHBA, Holanda, Suedia, Austria, Norvegjia, Gjermania dhe Belgjika kanë ngritur akuza dhe kanë përgatitur një grup pyetjesh rreth situatës në Xinjiang.

Përpara mbledhjes, Kina po jep një tjetër version rreth kampeve, ku ish të burgosurit kanë thënë se janë keqtrajtuar, janë detyruar të mësojnë gjuhën mandarine, si dhe t’i nënshtrohen indoktrinimit politik. Qeveria kineze ka filluar të njoh ekzistencën e tyre, por i ka përshkruar kampet si qendra të formimit profesional që synojnë “riedukim” në kuadër të një fushate kundër terrorizmit. / k.j

Burimit: The Guardian

Feminizmi / SLIDER BALLINA

Europa e udhëhequr nga gratë

Redaksia Posted On 06/11/2018

Vitet e fundit është parë një rritje e madhe e numrit të grave udhëheqëse, jo vetëm brenda Europës, por edhe jashtë saj. Ndërkohë që në Shtetet e Bashkuara po diskutohet në fushatën aktuale zgjedhore për një rritje të përfaqësimit të grave në politikë, duket se ndryshimi në Europë është shumë më i madh.

Lajmi se Merkel do të tërhiqet nga kreu i partisë dhe se nuk do të kandidojë më për Kancelare të Gjermanisë, mund të duket si një kthim prapa përsa i përket grave në politikë, por aktualisht Gjermania nuk është i vetmi shtet me një udhëheqëse grua.

Një grafikë e Radios Europa e Lirë tregon mbi numrin grave udhëheqëse dhe se aktualisht 10 shtete europiane drejtohen nga gra. Në po këto shtete kemi dhe nje numër të konsiderueshëm të kabinetit qeveritar të përbërë nga ministre gra dhe një numër të madh të grave deputete në parlament.

Estonia, Lituania, Malta dhe Kroacia kanë një grua për Presidente, ndërsa Islanda, Norvegjia, Britania e Madhe, Serbia, Rumania dhe Gjermania kanë një grua në krye të qeverisë. Raporti i grave në kabinetin qeveritar është më i madh se i burrave në Spanjë me 61%, në Suedi me 54% dhe Francë me 53%. Në një situatë të ngjashme është dhe Shqipëria me gjysmën e kabinetit qeveritar të përbërë nga ministre gra, dhe pavarësisht debatit të kuotave apo nëse këto qeveri janë vërtet efikase apo jo, shifrat tregojnë se në disa nga ekonomitë udhëheqëse të Europës apo dhe shtete me ndikim të madh rajonal, udhëheqja ka rezultuar e suksesshme./ k.j

Newer Posts Older Posts

Copyright

Redaksia

Ngacmimet seksuale/ Studentët e Universitetit të Prishtinës në protestë kundër profesorit

Sistemi gjyqësor në Bosnje-Hercegovinë kufizon informacionin për krimet e luftës

Kosova, e para në Europë për vdekjet nga ndotja e ajrit

Protesta e banorëve të Astirit dhe mospërfillja e qytetarëve në vendimmarrjen lokale

Pritet takimi i radhës i presidentëve Vuçiç-Thaçi në Bruksel

10 burra arrestohen në Tanzani për shkak të homoseksualitetit

Tanzania fillon një fushatë përndjekjeje për personat e komunitetit LGBT

Lirohen 79 nxënës të rrëmbyer në Kamerun

Tirana i shtohet listës së qyteteve europiane me ajrin më të ndotur

UNESCO krijon Observatorin e gazetarëve të vrarë

Kandidatët që bënë histori ditën e djeshme gjatë zgjedhjeve në SHBA

Ngacmimet seksuale në hapësirat publike

Facebook zotohet të angazhohet më shumë në mbrojtjen e të drejtave të njeriut

Kina dërgon miliona Ujgurë në kampe internimi

Europa e udhëhequr nga gratë

Recent Posts

Copyright

Redaksia

Recent Posts

Etiketa