Afirmimi i rolit të rinisë si promovues i të drejtave të njeriut, zhvillimit, paqes dhe demokracisë, ishte në fokus të një diskutimi të hapur të organizuar në Durrës në kuadër të një serie aktivitetesh publike të organizuara në qytete të ndryshme të Shqipërisë për të shënuar 70-vjetorin e Këshillit të Evropës. Ky aktivitet, i organizuar në bashkëpunim me Ambasadën Franceze, në kuadër të Kryesisë Franceze të Komitetit të Ministrave, dhe me mbështetjen e EU Info Desk dhe Bashkisë së Durrësit, kishte për qëllim diskutimin dhe shkëmbimin me studentë, aktivistë të rinj dhe përfaqësues të shoqërisë civile të ideve se si të përfshihen politikat rinore dhe të rritet pjesëmarrja e të rinjve në nivel vendor dhe evropian.
Kryebashkiaku i Durrësit, znj. Valbona Sako, mirëpriti pjesmarrësit në ambjentet e Bashkisë dhe i informoi ata për inciativat drejtuar të rinjve në qytetin e Durrësit. Ajo i bëri thirrje të rinjve të tregohen më aktiv në proceset e konsultimit, të bashkohen dhe të propozojnë ide që mund të ndryshojnë qytetin.
Kreu i Zyrës së Këshillit të Evropës në Tiranë, znj. Jutta Gützkow, iu referua të drejtës për t’u organizuar në shoqata, e cila garantohet nga Konventa Evropiane e të Drejtave të Njeriut dhe theksoi rëndësinë e përfshirjes së të rinjve në politikë dhe kontributin e të rinjve shqiptarë në përgatititjen dhe zbatimin e politikave rinore në nivel evropian.
Ambasadorja franceze në Shqipëri, znj. Christina Vasak, u fokusua në prioritetet e Presidencës Franceze të Këshillit të Evropës, ku spiegoi pse pjesmarrja e të rinjve është e rëndësishme për mbrojtjen e të drejtave themelore të njeriut dhe konsolidimin e demokracisë.
Luis Bekteshi, drejtues i Qendrës Rinore “Perspektiva”, njëkohësisht dhe anëtar i Këshillit Këshillimor të Këshillit të Evropës tregoi se si organizatat rinore mund të marrin pjesë në sistemin e bashkë-menaxhimit të sektorit të rinisë.
Nga ana e tij, Kreshnik Loka, nga Zyra Rajonale për Bashkëpunim Rinor (RYCO) ndau me pjesmarrësit si kjo organizatë po promovon pajtim dhe bashkëpunim në Ballkanin Perëndimor.
Panelistët bën apel tek të rinjtë në audiencë për t’u angazhuar në shoqëri dhe të përdorin sa më mirë mundësitë e ndryshme për përfshirje si në politikat lokale, edhe ato në nivel evropian./ coe shqip
