Një axhendë, a një tjetër? Me dokumenta!!!

Më 5 gusht 2021, WikiLeaks publikoi mbi 17,000 dokumente nga organizatat e djathta HazteOir dhe CitizenGO, që hedhin dritë mbi aktivitetet e tyre ndërkombëtare që datojnë nga 2001 deri në 2017. Duke përfshirë lista donatorësh, plane strategjike, tabela financiare çka tregon një rrjet të mirë organizuar me ndikim të gjerë.

HazteOir u themelua në Spanjë në vitin 2001 dhe në vitin 2013 krijoi CitizenGO për të zgjeruar veprimtarinë përtej vendeve spanjisht folëse. Të dyja organizatat promovojnë vlera konservatore ekstremiste dhe janë të lidhura me organizata të ngjashme në gjithë botën.

Në Shqipëri shpesh dëgjojmë për teori konspirative, sikur organizatat ndërkombëtare po promovojnë axhenda të fshehta për të ndikuar shoqërinë dhe politikën shqiptare, veçanërisht lidhur me të drejtat e komunitetit LGBT+. Këto teori përhapin frikën se ka një axhendë të madhe për të ndryshuar vlerat tradicionale shqiptare, të familjes, të shoqërisë apo një fushatë për ndikimin me individë. Megjithatë, dokumentet e publikuara nga WikiLeaks tregojnë një të vërtetë tjetër. Organizatat konservatore ekstremiste si HazteOir dhe CitizenGO janë ato që po ndjekin axhenda të qarta dhe të mirë organizuara për të ndikuar politikën dhe vlerat shoqërore, jo vetëm në nivel global, por edhe në vende si Shqipëria.

Dokumentet tregojnë se këto organizata përdorin strategji të sofistikuara dhe fonde shumë të mëdha për të lobuar kundër të drejtave të komunitetit LGBTQI dhe dhe krijimit të familjes. Ata krijojnë dhe promovojnë fushata që maskohen si mbrojtje e “vlerave familjare” ndërsa, në fakt, synojnë të përhapin një ideologji konservatore të polarizuar.

Në Shqipëri, ku debati për të drejtat e komunitetit LGBT+ është një temë tejet delikate, këto gjetje janë tejet të rëndësishme, për të hedhur dritë mbi thashethemet e fushatave, e axhendave. Ato tregojnë se ndërsa përflitet për axhenda të fshehta pro-LGBT+, janë pikërisht grupet konservatore ekstremiste që kanë një plan të qartë dhe të financuar për të ndikuar në shoqërinë tonë.

Në raport theksohet rëndësia e kontrollit dhe transparencës financiare për të gjitha organizatat, qofshin ato joqeveritare, fetare apo të çdo lloji tjetër. Në Shqipëri, ky parim duhet të zbatohet për të siguruar që asnjë organizatë nuk mund të veprojë në hije, duke ndikuar në mënyrë të fshehtë politikën dhe vlerat shoqërore.

Publikimi i këtyre dokumenteve, ku një bilanc financiar të 2015-ës mund ta gjeni këtu, është një rikujtesë se debati për axhendat e fshehta duhet të bazohet në prova të qarta dhe transparencë dhe jo ne teori konspirative.