Aktivistja Greta Thunberg, së bashku me të tjerë adoleshentë aktivistë që po frymëzojnë me mijëra të tjerë për të reaguar mbi emergjencën klimatike, doli ditën e djeshme në një komision të Kongresit Amerikan mbi Klimën, ku beri thirrjen për politikën kudo në botë: “Duhet të bashkoheni rreth shkencëtarëve dhe duhet të reagoni për klimën”.
Për të gjithë aktivistët e rinj, që prej muajsh tashmë organizohen të premteve në Marshimet për të ardhmen, zgidhja është shumë e thjeshtë. Zgjidhja i përket shkencës, dhe politika duhet të dëgjojë.
Greta Thunberg është kthyer në simbol të një lëvizje mbarëbotërore. Miliona njerëz janë me të njëjtin mendim me të. Shkencëtarët po injorohen nga burokratë e politikanë, të cilët me shumë mundësi as nuk do arrijnë të mbijetojnë dekadat e ardhshme për të parë shkatërrimin që parashikohet.
Në prag të Grevës Botërore të Klimës, që pritet të nisë ditën e premte, një studim mbi monitorimin e objektivave të vendosura në Samitin e Klimës në Paris, tregon se këto objektiva janë të arritshme dhe se emetimet e gazit karbonik mund të përgjysmohen deri në vitin 2030.
Në raportin mbi Reagimin Eksponencial mbi Klimën thuhet se:
“Emetimet e gazit serë mund të përgjysmohen në dekadën e ardhshme nëse një numër i vogël i teknologjive aktuale dhe tendencave të sjelljes do të pranohen dhe përdoren më gjerësisht.”
Studiuesit kanë konstatuar gjithashtu se “lëvizjet e forta të shoqërisë civile janë të nevojshme për të nxitur një ndryshim të tillë.”
Energjia diellore dhe e erës, tani më e lirë se karburantet fosile në shumë rajone, duhet të përrhapen më me shpejtësi për të zëvendësuar gjenerimin e qymyrgurit, dhe vetëm kjo mund të përgjysmojë emetimet nga gjenerimi i energjisë elektrike deri në vitin 2030, sipas raportit.
Shmangia e shpyllëzimit dhe përmirësimi i menaxhimit të tokës mund të zvogëlojë emetimet në ekuivalentin e rreth 9 miliardë ton dioksid karboni në vit deri në vitin 2030.
Duke nxitur ndryshimin e sjelljeve, të tilla si largimi nga konsumimi i tepërt i mishit dhe shtimi i presioneve ndaj qeverive dhe kompanive, lëvizjet e aktivistëve kanë fuqinë për të drejtuar transformimin e nevojshëm në dekadën e ardhshme, thonë autorët e raportit.
Ulja e temperaturës me 1.5 gradë celcius deri në vitin 2030 është ende e arritshme, nëse reagimi institucional e në nivele qeveritare e ndërqeveritare është i shpejtë dhe i efektshëm. Organizimi dhe aktivizmi shoqëror është faktori kryesor nxitës i këtyre lëvizjeve dhe me grevën e klimës ditën e premte, që pritet të mbahet dhe në Tiranë, u jepet mundësia qytetarëve shqiptarë të fillojnë të mendojnë për të ardhmen, përtej premtimeve boshe dhe me veprime konkrete.
Artikuj të rekomanduar
Burimi: The Guardian
Burimi i fotos: Flickr/NPS Climate Change Response
