BE dhe OKB bëhen bashkë për t’i dhënë fund dhunës me bazë gjinore

Dhuna ndaj grave dhe vajzave ndodh çdo ditë, qoftë në shtëpi, në punë, në shkollë, në rrugë ose në internet. Rreth 1 në 3 gra në të gjithë botën kanë përjetuar dhunë fizike ose seksuale në një moment të jetës së tyre.

Bashkimi Evropian dhe Kombet e Bashkuara filluan në shtator 2017 Iniciativën e Spotlight, një partneritet për të eleminuar të gjitha format e dhunës ndaj grave dhe vajzave.

BE ka ofruar fonde fillestare prej 500 milion€ duke ftuar donatorë dhe partnerë të tjerë të bashkohen me Nismën për të zgjeruar shtrirjen dhe qëllimin e saj.

Ditën e premte, gjatë punimeve të Asamblesë së Përgjithshme të Kombeve të Bashkuara në Nju Jork, Bashkimi Evropian dhe Kombet e Bashkuara ftuan të gjitha vendet, udhëheqësit, përfaqësuesit e shoqërisë civile dhe ambasadorët vendorë për t’u bashkuar me lëvizjen në fjalë dhe të ndërmarrin veprime për t’i dhënë fund dhunës ndaj grave dhe vajzave.

Përpara ngjarjes, Përfaqësuesja e Lartë e BE Federica Mogherini tha: “Dhuna ndaj grave është dhunë ndaj tërë shoqërisë – kështu që e gjithë shoqëria duhet të reagojë për t’i dhënë fund asaj. Bashkimi Evropian tashmë është investitori i parë në barazinë gjinore përreth botës, dhe së bashku me partnerët tanë, ne do të vazhdojmë të luftojmë për të drejtat e njeriut të grave.”.

Dy vjet pas fillimit të saj, aktivitetet e Iniciativës Spotlight janë duke u shtrirë në tërë globin – falë angazhimit të BE-së dhe OKB, dhe mbështetjes së qeverive partnere dhe shoqërisë civile në të gjitha nivelet. 13 vende kanë filluar tashmë zbatimin e programeve të Spotlight, dhe rreth 2/3 e fondit fillestar të dhënë nga Bashkim Evropian prej 500 milion€ janë ndarë tashmë midis shteteve pjesëmarrëse në rajone të ndryshme të botës.

Pjesëmarrja e publikut, aksioni politik ambicioz i cili bazohet në politika të bazuara në prova, si dhe në rritjen e burimeve dhe gjenerimit të njohurive janë të gjitha thelbësore për nismën dhe angazhimin e përbashkët për ndalimin e dhunës në të gjithë format e saj.

Burimi: Komisioni Evropian
Burimi i fotos: Flickr