Javën e kaluar dhjetëra aktivistë u lënduan dhe dhjetëra të tjerë u morën në mbrojtje nga Policia, pasi një grup protestuesish dhe huliganësh të dhunshëm prishi marshimin e Krenarisë në qytetin e vogël të Bialystokut në Poloni.
Në përgjigje të episodeve të dhunës, mbi 1000 qytetarë u mblodhën ditën e shtunë në Varshavë për të mbështetur të drejtat e komunitetit LGBT dhe respektimin e tyre.
Partia qeverisëse e Polonisë (PiS) ka kthyer çështjen e të drejtave LGBT në një motor fushate elektorale në prag të zgjedhjeve parlamentare në Tetor. Ato i konsiderojnë të drejtat LGBT si të panevojshme dhe paradat e krenarisë si shfaqje publike e seksualitetit.
Intoleranca dhe mospranimi i të drejtave LGBT u demonstrua në Bialystok ku të shtunën e shkuar grupe të mëdha burrash dhe anti-protestuesish sulmuan qytetarët që po marshonin duke i goditur dhe duke i fyer.
Policia arrestoi mbi 30 persona në lidhje me episodet e dhunës dhe kryeministri Mateusz Morawiecki i dënoi këto sulme.
Në ditët para organizimit të paradës në Varshavë, një revistë konservatore polake nisi shpërndarjen e disa ngjitëseve ku shkruhej “zonë e lirë për LGBT” e cila do nxiste sulmet ndaj ambjenteve pranuese ndaj komunitetit LGBT. Një gjykatë e kryeqytetit e ndaloi përkohësisht këtë veprim duke e konsideruar si të papërshratshme në prag të organizimit të Paradës së Krenarisë.
Shpërndarja e propagandës “anti-LGBT” u dënua nga qytetarë të shumtë. Disa prej pjesëmarrësve në Pride, kryesisht të rinj, dolën në Paradë për të protestuar kundër këtyre posterave dhe episodeve të dhunës.
Thirrjet e tyre për pranim dhe respektim të komunitetit, e kthyen protestën e së shtunës në një marsh solidariteti për grupet e margjinalizuar.
Ndërkohë që në qershor, në Varshavë, u mbajt Parada e Barazisë, e cila shënoi numrin më të madh të pjesëmarrësve në vite, pavarësisht thirrjeve për dhunë dhe fyerjeve online.
You may also like
