Përdhunimi i të miturës në Kavajë dhe raportimi jo-etik i lajmit

Ngjarja e ndodhur para disa ditësh në Kavajë, për shkak të përfshirjes së madhe të opinionit publik ka sjellë një mbulim të gjerë mediatik, ku u ndeshën në jo pak raste tituj të cilët bien ndesh me parimet etike të raportimit të lajmit dhe vetë Kodit të Etikës së mediave Shqiptare.

Sipas një njoftimi të Këshillit Shqiptar të Medias, raportimi i lajmit nga media të ndryshme është shoqëruar me shkeljen e kodit të etikës në disa pika të tij.

Fillimisht përmendet shkelja e privatësisë të së miturës, duke bërë të ditur emrin e shkollës, iniciale apo detaje të tjera që mund të identifikojnë atë, veprim ky që bie ndesh dhe me legjislacionin shqiptar.

Një shkelje tjetër pasqyrohet përmes publikimit të lajmeve të pareferuara ku nuk vendoset burimi dhe që mund të përmbajnë informacion të paverifikuar.

Shkelja e tretë ka të bëjë me disa media që po publikojnë detaje të jetës intime të së miturës.

Përderisa në të është e përfshirë një e mitur, jeta e saj intime nuk duhet në asnjë mënyrë të publikohet. Aq më tepër kur prejardhja e këtij informacioni është e paditur. Asnjë media nuk ka publikuar se cili është burimi zyrtar i këtij informacioni. Kjo përbën shkleje flagrante të etikës së gazetarit

Shkelje të tjera kanë të bëjnë me mungesën e ndarjes së qartë midis faktit nga opinioni dhe prania e komenteve me përmbajtje ofenduese, të cilat duhen moderuar nga media e cila publikon lajmin.